L’Acziun 72 uras na metta betg mo la Svizra sutsura! L’idea è naschida en la Germania, nua ch’ina tala acziun è gia vegnida menada atras a Münster l’onn 1995. L’onn 2009 èn 100’000 giuvnas e giuvens ord set pajais federativs (Bundesland) sa participads a l’acziun cun il num „72 Stunden – uns schickt der Himmel“.

En l’Austria ha il project num “72 Stunden ohne Kompromiss“. L’acziun ha lieu l’onn 2010 gia per la tschintgavla giada. Vinavant è l’acziun era gia vegnida menada atras pliras giadas en l’Ungaria ed en l’Italia (Tirol dal Sid). Organisaziuns da la Bosnia-Herzegowina, da la Slovachia e da la Slovenia planiseschan medemamain per l’onn 2010 in project da 72 uras per lur pajais.

Las organisaziuns da giuventetgna da tut quels pajais ch’organiseschan quella acziun visitan in l’auter per far in barat d’experientschas. La visiun per lunga vista è: in’acziun da 72 uras communabla en l’entira Europa!

Has ti gust da sa participar tar ina Acziun 72 uras en in auter pajais? U vuls ti avair giasts or da la Bosnia, l’Ungaria, Slovenia u la Slovachia? Lura s’annunzia tar la FSUG (031 326 29 29, info@72stunden.ch) e nus procurain per ils contacts necessaris. En il suandant paragraf chattas ti infurmaziuns davart las activitads en auters pajais.

Bosnia-Erzegovina

Step by step: „72 uras senza cumpromiss“ cumenzan en la Bosnia-Erzegovina!!!
La finamira principala per la Bosnia-Erzegovina è sper la promoziun da la lavur da giuventetgna, era da mussar a la giuventetgna ch’ella sa far chaussas grondiusas sch’ella dovra ses talents per auters. Als giuvenils vegni dà la pussaivladad da sviluppar lur persunalitad e da pudair enritgir lur vita. En quai senn han ils organisaturs tschernì il slogan „VolontiRAJ NA ZEMLJI“ quai che vul dir tant sco „voluntari per il tschiel sin terra“.
Dals 15 fin 17 d’october èsi uschè lunsch per l’emprima giada! Ils organisaturs quintan che blera giuventetgna, augsegners ed organisaziun che sa participeschian a l’acziun tenor il moto „porscha il maun“ – „Gida“.

La preistorgia: il settember 2008 ha ina gruppa da giuvnas persunas dal center da giuventetgna da la archidiocesa Vrhbosna a Sarajevo cumenzà a far patratgs davart il project en lur regiun. Ivana Klacar, collavuratura dal center da giuventetgna ed Anne Tenhaef, praticanta da la Germania han visità l’october passà l’acziun en l’Austria ed han suenter cumenzà cun la planisaziun dal project per Renovabis.
Il team che maina atras il project en la Bosnia-Erzegovina sa cumpona da la manadra da project Ivana Klacar, l’assistenta da project Ivana Vidovic, Nikolina Tuka per la lavur da publicitad e Dejan Krstovic che fa il design e la pagina d’internet. Entant vegn il team rinforzà da la represchentaziun federala da giuventetgna e dumbra var 50 persunas.

Austria

72 uras senza cumpromiss – la pli gronda acziun da giuventetgna da l’Austria
72 uras senza cumpromiss – la pli gronda acziun da giuventetgna da l’Austria ha gì fitg grond success. Perquai vegn ella menada atras dals 21 fin ils 24 d’october 2010 per la 5avla giada. Ils organisaturs èn la Giuventetgna catolica da l’Austria ensemen cun youngCaritas.at e Hitradio Ö3. 5000 giuvnas e giuvens en la vegliadetgna da 14 fin 25 onns s’engaschan latiers 72 uras ditg en var 400 acziuns singulas en l’entira Austria per il social esser, per il svilup politic e l’ecologia. Exempels per acziuns èn:
- renovar in alloschi d’urgenza ensemen cun persunas senza abitadi
- procurar che bajetgs uffizials èn accessibels per persunas cun impediments
- organisar in’excursiun per cussedentAs d’ina chasa da tgira
- realisar teaters u films davart il tema exclusiun
- tgirar in guaud
„72 uras senza cumpromiss“ è ina purschida per persunas giuvnas che vulan s’engaschar in temp limità, e vulan uschia gidar en situaziuns d’urgenza, giudair la cuminanza ed era far l’experientscha ch’engaschi social fa spass.
Infurmaziuns: www.72h.at

Slovachia

La finamira dal project è, da metter en il center l’impurtanza da la lavur voluntaria da la giuventetgna e l’influenza positiva sin la societad. Passa 4700 uffants, giuvnas e giuvens han la pussaivladad da realisar circa 400 projects aifer las 72 uras ed uschia francar la valur da la lavur da giuventetgna tar la societad slovaca.
Il project vegn organisà dal Youth coucil of Slovakia (RMS), e da l’associaziun tetgala da 38 organisaziuns da giuventetgna ed uffants. RMS organisescha l’acziun 2010 per l’emprima giada ensemen cun 20 organisaziuns nunguvernamentalas. Al project pon tant las organisaziuns sco er persunas singulas prender part, che vulan promover la lavur voluntaria.
Contact:
Youth council of Slovakia (RMS)
Pražská 11, 811 04 Bratislava
Project manager: Ms. Elena Dikáczová
Email:

Infurmaziuns: www.72hodin.sk

Slovenia

Idea centrala:
Far reclama tar la giuventetgna per la lavur voluntaria.

Andament dal project:
Aifer 72 uras (3 dis) duain las gruppas realisar in pensum. Quai pensum enconuschan las gruppas pir cun il cumenzament dal project. Il pensum è per las giuvnas ed ils giuvens ina schanza d’emprender d’enconuscher lur cunfins. Els pon cuntanscher nova savida ed experientscha, diminuir pregiudizis e chattar novs amis. Las singulas gruppas consistan ord 3 fin 25 persunas.

Sorts da projects
- projects da vischnancas
- projects socials
- projects ecologics
- projects interculturals
- projects da politica da svilup

Temp e lieu: 25 – 27 d’october 2010, en l’entira Slovenia
Organisatur: SMC Maribor ed ŠOM Maribor
Partenaris: gruppas e clubs da giuventetgna, gruppas informalas e persunas singulas
ParticipantAs: persunas giuvnas tranter 12 e 20 onns
Contact ed infurmaziuns: ,

Ungaria

Tenor l’idea da la Germania organisescha il Biro da giuventetgna ecumenic da l’Ungaria il project „72 uras senza cumpromiss“ l’onn 2007 per l’emprima giada. Gia 2008 ha l’event gì lieu per la segunda giada. 72 citads e vischnancas èn stadas involvidas en l’entir pajais cun passa 2000 participants. Dals 15 fin ils 17 d’october 2010 ha l’acziun puspè lieu en l’entira Ungaria.
„72 uras senza cumpromiss“ è in acziun sociala, che vul far gust a giuvnas e giuvens da prestar lavur voluntara. Gruppas da tschintg fin 25 giuvnas e giuvens reliseschan differentas acziuns per far insatge bun per la societad, sco per exempel la renovaziun d’instituziuns socialas u la tgira d’in guaud.
En l’Ungaria vegn l’acziun organisada dal Biro da giuventetgna ecumenic sut il patrunadi da las trais baselgias cristianas da l’Ungaria (catolics, calvinists e luterans).
Ulteriuras infurmaziuns: www72ora.hu
Contact:
Ecumenical Youth Office
1118 Budapest, Himfy u. 9., Hungary



Ulteriuras infurmaziuns e links:
Germania: http://www.72stunden.de
Austria: http://www.72h.at
Ungaria: http://www.72h.hu
Italia: http://www.72h.it