La FSUG è l’inizianta da l’Acziun 72 uras
La FSUG - Federaziun svizra da las uniuns da giuventetgna - è dapi passa 75 onns il center per la politica da giuventetgna en la Svizra. En il medem mument è ella era il portavusch da la giuventetgna envers la confederaziun e la publicitad. La FSUG promova lavur da giuventetgna organisada e rinforza la participaziun da giuvnas e giuvens sin tut ils nivels da la societad. Ella vul motivar las giuvnas e giuvens, da sa participar vid il svilup dad ina societad averta al mund, democratica e paschaivla. La SFUG s’engascha cunzunt per che giuvnas e giuvens vegnan integrads e per ch’i vegna surdà ad ellas ed els responsabladad. L’onn 2005 ha la FSUG e sias organisaziun commembras organisà per l’emprima giada l’Acziun 72 uras en Svizra.

Activitads
Ils puncts principals da la lavur da la FSUG èn la promoziun da la participaziun e la renconuschientscha da la lavur voluntara, la promoziun da la sanadad, l’integraziun da giuvnas e giuvens en la societad sco era en la lavur intellectuala. Sin nivel internaziunal gioga la FSUG ina impurtanta rolla tar il barat d’infurmaziun e d’experientschas, sco era tar la represchentaziun dals interess e sco partenaria activa per projects.

Cun ses projects procura la FSUG adina puspè ch’i vegn discurrì dad ella: uschia s’engascha ella per exempel per la promoziun da giuvnas dunnas tar il program da mentoring «dunna per dunna», cun ils projects «Volià» e «risk it» per sanadad e schientscha per risicos, cun la «sessiun da giuventetgna» u cun l’«Acziun 72 uras» ed en l’exteriur cun «Youth Rep» e «Youth for devlopment».

Tgi èn ils commembers?
La Federaziun svizra da las uniuns da giuventetgna è ina organisaziun tetgala da las organisaziuns da giuventetgna ch’exista dapi 1933. Var 80 organisaziun èn commembras da la FSUG e represchentan da lur vart passa in mez milliun giuvnas e giuvens. Las organisaziun commembras sa cumponan da giuvnas partidas e sindicats, federaziuns professiunalas, organisaziuns confessiunalas e pacifistas, federaziuns da studentas e students e da scolaras e scolars, dals battasendas, d’uniuns per l’ambient, organisaziuns che porschan studis e vacanzas en l’exteriur, organisaziuns da giuventetgna regiunalas e chantunalas, centers da giuvenils e autras organisaziuns ed instituziuns per giuventetgna.

Dapli davart la FSUG datti sin la pagina d’interne www.sajv.ch.